أمير

مرحبا! أنا أمير، وحابب أحكيلكو عن حالي.

أنا بحب كثير اللعب بالتراب، بجيب الشوفيلات والتركات بعبيهم تراب وبنقلهم من محل لمحل. بالبيت بلعب بالتراب بالحاكورة (الجنينة ) وبالروضة بلعب بالساحة بالرمل. لما بلعب بالتراب، بحس بأمان وسعادة. سيدي دايماً لما يروح ع الزتونات بوخذني معه، وأنا بنبسط كثير.
بالليل، السما بتمتلي نجوم، بطلع أنا وابن عمّي عنان على سطح بيتنا، السطح اله جدار عالي داير ما يندار، منتطلع على النجوم سوا، وأنا بشرح لابن عمي عن النجوم، وعلّمته أسماء النجوم اللي بعرفها.
مرات بستغرب كيف بنفع حدا يحب الأرض كثير كثير وكمان يحب السما كثير كثير، مش غريب هذا الإشي؟! لما سألت سيدي قال لي: سهلة يا سيدي، الحياه مليانه تناقضات، في حامض وفي حلو، في أبيض وفي أسود.
شو رأيكو نلعب لعبة التناقضات؟ واحد بيقول كلمة والثاني بيلاقي عكسها..
أصلاً انا لما اطّلع ع النجوم وانزل نام، بظل أتخيل السما والنجوم والغيوم…بسترخي وبغفى.
إحنا بعيد النبي شعيب، بنروح كلنا نزور مقام النبي شعيب عليه السلام. كل الدروز بالبلاد بحجّوا لقبر النبي، وهناك بكون في فعاليات كثيرة. أنا بحب الوّح بعلم الدروز الي هو شعارنا، وفي كمان أغاني بتمدح النبي شعيب، بتحبوا تسمعوا أغنية أنا بحبها؟
أغنية النبي شعيب
عنجد كثير بحب النجوم والكواكب. اليوم قبل ما أنام شو رأيكم نعمل مسابقة مين بعرف أكثر معلومات عنها، مثلاً احكوا أسماء كواكب بتعرفوها أو أي كوكب أقرب للأرض أو أقرب للشمس؟ كيف بدور القمر؟ أي كوكب أكبر واحد؟ شو اسم أصغر كوكب؟ شو الكواكب اللي وصلها الإنسان؟ ليش الانسان بحاول يوصل لزحل؟ وهيك أشياء مثلاً.
في اكلات كثيرة اميي بتطبخها أنا بحبها، مثل الشنيتسل والورق ورب البندورة وغيرها، بس انا بحب اعمل لفة اللبنة والزعتر مثل هيك.

 بحب أشكركم جزيل الشكر على استضافتي عندكم.
تذكروا أنني لست دمية عادية، بل دمية تشبه الطفل.