مرحبا! أنا نور.
شكرأ انكم قبلتوا تستضيفوني ببيتكم. تذكروا إني أنا دمية بتشبه الأولاد، وعندي قصتي الي بحب اشاركها معكم. مثلاً، أنا بحب إسمي كثير، وبحس إنه بعطيني ضي وفضا وأمل. وأحسن صاحبة عندي إسمها شمس. إحنا صاحبات حتى بالأسماء! مرات بفكر لو كان بالصف بنات إسمهم قمر أو نجمة كان ممكن يكونوا صاحباتنا كمان. أنا وشمس بدنا نصير عالمات ونخترع أدوية لجميع الأمراض الخطيرة. كل يوم بنتفرج بالعدسة المكبرة على الأشياء الصغيرة، ومنحب نعمل تجارب مع بعض.
ممكن تشوفوا هون تجربة صغيرة:
تجارب علمية ممتعة.. بكاسة من المطبخ!
انا بحب ستى ندى كثير. مرات هي بتروّحني ع البيت لما أهلي يتأخروا بالشغل. ستي كانت معلمة زمان، وهي بتحكي لي حكايا كثير. ستي كمان بتعلمني كيف اتصرف لما ازور ناس تانيين. ودايماً بتطلب مني احكي عنها وعن عيلتها إللي تهجرت من قرى الروحة. ستي مرات بتلبس ثوب فلسطيني أسود ومطرز بخيوط حمرا، وأنا بغنيلها اغنية “ستي إلها ثوب وشال”. بتعرفوها للغناي؟ بتحبوا تغنوها معي؟
أغنية ستي إلها ثوب وشال
يوم الجمعة، منحب نزور ستي احنا وعموميتي وأولادهم كلهم. بيت ستي ضيق وصغير، مرات بنتغاوش أنا وأولاد عمي، ومرات منلعب بصوت عالي. الكبار بيصيحوا علينا وبقولولنا اطلعوا العبوا برا. ستي بتقولهم خليهم يلعبوا وينبسطوا- مهم صغار، وبيت الضيق بيوسع ألف صديق. ستي عندها مثل كل موضوع.
بتحبوا نلعب لعبة الامثال العربية مع بعض؟
واحد بختار الموضوع والثاني لازم يلاقي مثل مناسب، وبعدين منتبدل. يعني إذا بدنا نحكي عن العلاقة مع الجيران، عنا مثل بقول “دوّر على الجار قبل الدار”، أو “النبي (علية الصلاة والسلام) وصى على سابع جار”.
هاتوا اعطوني أمثله عن الصداقة القناعة الخداع والغش الأمانة والصدق الشجاعة أو الكذب….
أنا بحب أتذكر وأكرر الامثال قبل النوم، لأنهم بساعدوني أسترخي وأنام.
أنا بحب كثير ليالي رمضان والسهر مع العيلة، وأكثر إشي بحب لما بنعمل لقيمات او العوامة للتحلاي انا وعمتي.
مره عمتي علمتني كيف اعملها وصرت أعملها دايماً. بتحبوا نعملها مع بعض؟
عوامة لقيمات- أنجح طريقة منزلية بدون ما تعبي الدنيا زيت
شكراً على الاستضافة!
وتذكروا من فضلكِم أنني لستُ دمية عادية، بل دمية تشبه الطفلة.