مرحبا, انا اسمي امير
أميي (هيك في بلدة يركا بنادوا على الأم) اختارت لي اسمي وبوي اختار اسماء اخواتي الثلاث اللي اكبر مني وأنا أصغر واحد في البيت. اميي سمتني امير وكمان بتعاملني زي الأمير.
انا بروح على الروضة كل يوم ما عدا جمعة وسبت, بالروضة عندي صحاب كثير بس اكثر اشي انا صحاب مع تيم وعنان ، وكثير منحب نلعب في التراب والرمل ونعبي سيارات ونكفتها.احنا بنحب نلعب بكل اشي جاي من الطبيعة في الساحة (الروضة).
انا كثير بحب الحركة والرياضة وكلهن بضلو يقلولي اهدى, بس ستي بتقول اتركو في الحركة بركة. عشان هيك رحت على دورة جودو وحبيتها كثير الكل بفكر انها لعبة دفشة بس هيي بتعلمنا كيف ندافع ونحمي انفسنا. مش دائمًا بعمل كل الحركات صح، بس مدربي بقولي انو عم بتقدم حلو. في اخر السنة راح يكون منافسة وراح يجوو اهلي يشوفوني كثير متحمس.
حابب أحكيلكو شو صار معي قبل كم يوم لما رحت على ماي بيبي لعبت بألعاب كثيرة ودخلت غرفة الفضاء وانبسطت كثير وبنفس الليلة ما كنت عارف أنام، اتطلعت من شباك اوضتي على السما وصرت أراقب النجوم والغيوم وتخيلت كثير أشكال حلوة من الغيوم وفكرت كيف بقدر أوصل للقمر والنجوم؟ عندكو فكرة كيف؟
بفكر حلمي بتحقق إذا صرت رائد فضاء بقدر بالمستقبل, راح أطلع على القمر لانو انا بعرف انو رواد الفضاء بصلو لهناك.
ستي (الجدة) ساكنه تيحتنا, وكمان بيوت عموميتي في نفس البناية، حولين البناية في مشتله\حاكورة اللي بلعب فيها مع ابن عمي جواد ومع الان بنت عمي بنعبي تراب في الديزلات وبننقلهن من محل لمحل.
في كثير أشياء بحب اعملها مع ستي مثل لما تسقي الزريعة وبسالها ليش بتعتني فيهن هي قلتلي انو عقد ما بتعطي الطبيعة بتعطيك يا ابني شوف محلا شكلهن وريحتهن ولونهن وما احلى قصص ستي اللي دايمًا بتحكلي اياهن.
محلاها ستي بحب أعبطها كثير لانها دافية حنونة كثير، بحب أقعد في حضنها وهي تحكيلي القصص وكل قصة أحلى من الثانية. هي حكتلي عن ملابسها وملابس سيدي التقليدية هني ما بلبسو مثل بوي وايمي, ستي بتلبس ثوب اسود\كحلي طويل وبتغطي راسها بالفوطة البيضا (الشال) وسيدي بلبس القمباز(شروال\اللباس) الطويل مع القميص المكوي.
سيدي دايما بوخذني معو على الارضيات بنسقي وبنرطب الزتونات ولما نلمهن بياخذني على المعصرة, انا بحب سيدي وستي كثير راح كمل بطريقهن لانو كثير مهم كيف نتعامل مع سيدي وستي.
انا بحب اكل من اكلات ايمي الطيبات وبالأخص الاكلات اللي فيها رز زي ورق عنب, معكرونة, تبولة , شنيتسيل وأدهن خبزة مع دبس البندورة .
كثير بحب أرسم وأدهن بكل الألوان، بحب ألون نجمة الخمس حدود بألوانها الأصفر، الأزرق، الأبيض، الأحمر، والأخضر وخصوصا أني بحملها لما بروح على ” زيارة مقام سيدنا النبي شعيب” وبعايد على الكل بالعيد وبحكيلهن: ” زيارة مقبولة”.