السلام عليكم، أنا ياسين. بتعرفوا ليش سموني أهلي ياسين؟ جدي كان يحب يقرأ سورة بالقران اسمها سورة ياسين.
أنا ساكن في النقب وراح احكيلكم عن النقب وبلدي وعيلتي. النقب هي منطقة صحراوية في جنوب البلاد، وعشان هيك اسمنا بدو على اسم البادية- يعني الصحرا.
جدي حكالي انه العيشة اليوم بتختلف عن كيف كانت زمان.
زمان اجدادنا كانوا يسكنوا بخيمة واليوم احنا ساكنين ببيت وفي ناس ساكنين ببراكية- بقرى غير معترف فيها.
احنا ودار عموميتي ودار جدي ساكنين بحوش واحد، بس جدي بنى شج (الشج أو الشق هو جزء خارجي من المنزل موجود في حوش الدار) بالحوش جنب البيوت ليقعد بيه هو والرجال زي أيام زمان.
محمد ابن عمتي وهو كمان صاحبي ساكن كثير بعيد عني، هو ساكن بالشمال. مبارح اجى يزورنا مع أهله عشان فرح ولد عمي آخر الأسبوع. الفرح بقعد أسبوع، وانا كثير مبسوط انه راح نلعب سوا كثير.
بالفرح ابوه وأبوي بيقعدوا بالشج مع جدي وبستقبلوا الضيوف الرجال، وكرم الضيافة هو من عاداتنا ولا تسألوا قديش نكرمهم.
امي والحريم يقعدن في البيت أو في خيمة كبيرة. امي وعماتي بتلبسن ثوب مطرز تطريز فلسطيني بألوان حلوة وشال عالكتاف.
أنا ومحمد بنريد نرقص بالفرح عالدحية والدبكة.
عشان تعرفوني أكثر بدي نلعب لعبة زي اللي بتلاعبني إياها أمي- بتحزرني حزورة وإذا حزرت بتحكيلي قصة وإذا ما حزرت أنا بحكيلها قصة. كل مره كنت احكيلها قصة من مغامراتنا انا وصاحبي محمد بالحوش.
اسا رح أحزركم أشياء وأحكيلكم قصص عني.
1. أول حزيرة- بتحبوا تعرفوا ايش الأكلة اللي بريدها أنا أكثر من باقي الاكلات؟ جربوا احزروا؟
ما عرفتوا؟ طيب رح اقول لكم: أنا بحب فتة المبصلة (بصل مقسم صغير وبندورة مخرطة بهارات ومي بنطبخوا, وبنفت خبز الصاج لصغير وبنحط عليهن خلطة البندورة والبصل). يمكن هاذي الأكلة ببلدكم ما بتسوونها، وهي عندنا في النقب كثير معروفة والأغلب بريدها كثير كثير…أمممممم طيبة كثير.
2. صاحبي محمد بريد أكلة ثانية وهو بحبها كثير، بطبخوها بشمال النقب، مش الكل بطبخها…يلا احزروا؟
صاحبي محمد بحب أكلة الشوشبرك (شيش برك أو شُشْبَرَك هي أكلة مشهورة في بلاد الشام تتكون من عجينة محشوة بلحم غنم مفروم وملفوفة وتطبخ باللبن). بتعرفوا الشوشبرك انتوا صح؟
3. الحزيرة الثالثة- كل يوم أنا بنزل من بيتنا لبيت جدتي غصون قبل ما أروح على الروضة. ايش بشرب عندها، يلا احزروا؟ ما حزرتوا؟ بشرب عندها شاي مع أوراق المرمية والحليب اللي بريده.
4. عارفين شو حابب أصير لما أكبر؟ احزروا؟ حابب أصير مزارع واشتغل بالأرض عندنا. عندي منكوش وطورية بس لما صير كبير راح اشتري تراكتور يساعدني على الشغل بالأرض. وعندي حيوانات كمان وأنا بحبهم كثير وهم راح يساعدوني كمان على الشغل بالأرض…بس ظل إنه أكبر.
احنا مربيين بالحوش حيوانات الي ولولاد عمي واحنا مسؤولين عنهن- بنظف حواليهن، منسقيهم ومنطعميهم كل يوم. وعندي طيور حلوة كثير- عندي جاج وحمام- غير الغنم والحصان والمهر.
المهر بالذات حابب أخرفكوا عنه لأني بحبه وهو صديقي، وأنا اللي اخترتلو اسمه- سميته رعد.
رعد سريع كثير، مع أنه بعده صغير، بعده مش مسموح يركبوا عليه الكبار لأنه ما بقدر يشيلهن. رعد بحب ياكل قش وعشب من كفة إيدي، وبحب الجزر كمان. مرة حاولت أوكله حلويات بس ما قبل ياكلهن لأنه الحصان ما بوكل حلويات.
بالمنطقة اللي ساكنين فيها ما في حديقة العاب، عشان هيك الأيام اللي ننزل فيهن عالسبع ع الألعاب بكون مبسوط كثير.
لما بدنا نروح مشوار انا وأمي أو أبوي وخواتي رتيل وليان بنمشي على البر بساعات الغروب الحلوة، بنتمشى براحة وهدوء (البر: منطقة مفتوحة بعيدة عن البيوت والشوارع). وهناك في كثير أطفال وعائلات بطلعوا ع البر يتمشوا بس كله بروح عالبيت قبل الغروب عشان بصير كثير عتمة بالليل لانه مو بي كهربا.
أنا بحب عيد الأضحى كثير عارفين لي؟ لإنه كيف صرتوا تعرفوني أنا بحب الحيوانات كثير وبعيد الأضحى من الصبح في عنا فعالية الخروف. عمي من الصبح بطلع معنا بجيب الخاروف وبحطه في حوش الدار وانا وولاد عمي بنلاعبه وبنسقيه ميه، وجدتي غصون بتحكيلنا قصة عيد الأضحى. وعالمغرب بنروح بنعيد ع اهل أُمي، والأخوال والخالات الي ساكنين بعيد شوي عنا، ناخذلهم الهدايا وهم يطعمونا الحلويات ويعطوني العيدية الي اشتري فيها العاب. بعد العيد بكم يوم، برجعوا الحجاج من الحج، مرة عمتي جابت لي ولاخواتي ثوب جلابيه بيضاء وطاقيه مثل الحجاج، كنت البسها المسا واصلي جنب بوي وعموميتي…انا كثير أحب البسها.
أنا ياسين وعندي قصص كثيرة أخبركم إياها…..