مرحبا, أنا ميلا
بدلعوني ميلوش، سألت الماما عن اسمي حكتلي أنه اسمي مش عربي اسمي اسباني (اسبانيا) ومعناه البنت الحلوة. أنا وأخوي مجد توم (توأم) يعني كنا مع بعض في بطن الماما بنفس الوقت، كمان انا ومجد في البيت غرفتنا مشتركة، مجد كتير مرتب وانا شوي هقل منو وبحكيلي دايما ميلوش رتبي العابك وأغراضك، وانا ما برد عليه.
مجد بشبهني لون شعره مثل لون شعري بس شعري أطول، حتى لون عيونه مثل لون عيوني بس هو ولد وأنا بنت.
انا ما بحب حدا يمسك أغراضي وبزعل كثير إذا أخوي مجد اخذلي اياهن، بحب لعب الدمى وبحب البس مثلها انا عندي اواعي زي الدمى حلوة كثير عندي بلوزة مبرقة لونها احمر وفستانين مكشكشة كل الالوان وبحب البسهن بالمناسبات الحلوة. زي أيام الأحد بنتعلمش بالروضة وكمان ماما وبابا بروحش عالشغل بنلبس اواعي حلوة وبنروح على الكنيسة, هناك بنصلي, بنلعب وبنشوف الاصحاب وبعد ما نروح بغيير اواعي لاواعي مريحة زي اللي بلبسهن بالروضة عشان العب براحتي وبنروح مشوار, واكثر مشوار بحبو هو انو اروح اسبح ببحر حيفا ليش بحر حيفا عشان دايما بتيجي كمان نيل بنت خالتي اللي ساكنة بحيفا بنسبح مع بغض وبنلعب مع الأولاد بالرمل.
بحب كثير المناكير هديك المرة احترت كتير أي لون أحط على أظافري؟ زهري ولا ليلكي لانو هذول اكثر الوان اللي بحبهن. بالأخر قررت أحط على كل أظفر لون وما كنت عارفة أنها رح تطلع فكرة كثير حلوة طلعو بجننو. انا بحب الموسيقى, الرقص والغناني وكمان وانا العب بحط غناية دق دق الباب (انثى السنجاب) وبصير ارقص وأعمل حركات بايدي اللي حطيت عليهن مناكير ملونة.
هديك المرة رحت على صالون الشعر مع ماما عشان تقص شعراتها ولقيت زاوية بعملو فيها اظافر وفيها كتيررر مناكير ملونة اكتر من اللي عندي. انا حبيت الصالون كثير وتخيلت حالي زي عمو(صاحب الصالون) اللي عمل شعرات الماما وبفكر انو انا كمان بقدر اعمل كثير شغلات حلوة للزباين بشعراتهن مش بس اظافريهن.
وحكيت لمعلمتي وصحابي بالروضة عن هذا المشوار الحلو, المعلمة بتقول “عشان اصير فنانة وانا كبيرة لازم وانا صغيرة لازم امرن ايدي واشتغل كثير باللوان, القص, التلصيق وكثير أشياء, وكثير مهم الترتيب ونضب الأغراض ورانا”.
بتحبو تعرفو اكثر لعبة بحب العبها؟ هي انو حدا بغمض عيونو والباقي بتخبى اسمها غميضة وخالد ابن صفنا بسميها طميمة (مخباية) وانتو شو بتسموها؟
وفي كمان لعبة لما كثير أولاد بيركضوا وواحد بلحقنا لازم يمسك حدا مننا اسمها زقيطة (لحيقة\ امسكيني)
احنا عنا عياد حلوة (الفصح, الشعنينة وعيد الميلاد) أحلى عيد هو عيد الميلاد و انا بحبه كثير هو بيجي بالشتا فيو منزين شجرة وبنضويها وبنحط تحتها كل الشخوصة (الأشخاص اللي بنحطهن تحت الشجرة : ستنا مريم, الطفل يسوع, نايم بالمذوذ على القش, إبراهيم النجار, المجوس اللي جابو الهدايا للطفل يسوع وامو والرعيان) في المغارة تبعون العيد.
في عيد الميلاد بابا نويل بيجي وبايدو جرس وبجيب لكل الأطفال هدايا حلوة.
بتتجمع العيلة كلها عند دار سيدي وستي بكونو لابسين اواعي حلوة بنتعشى وبنلعب شدة مع بعض منغني غناية “ليلة عيد ليلة عيد”.
