السلام عليكم, انا ياسين
بتعرفوا ليش سموني أهلي ياسين؟ جدي كان يحب يقرأ سورة بالقران اسمها سورة ياسين.
أنا ساكن في النقب وراح احكي لكم عن النقب وبلدي وعيلتي
النقب هي منطقه صحراوية في جنوب البلاد عشان هيك اسمنا بدو على اسم البادية يعني صحراء.
سيدي حكالي انو العيشة اليوم بتختلف عن كيف كانت زمان. زمان اجدادنا كانو يسكنو بخيمة واليوم احنا ساكنين ببيت وفي ناس ساكنين ببراكية . احنا ودار عموميتي ودار جدي ساكنين بحوش واحد, بس سيدي بنى شق(معلومات للمعلمة : جزء خارجي من المنزل الموجود في حوش الدار) بالحوش جنب البيوت ليقعد بيه هو والرجال زي أيام زمان.
محمد ابن عمتي وهو كمان صاحبي ساكن كثير بعيد عني هو ساكن بالشمال, مبارح اجى يزورونا مع أهله عشان فرح ولد عمي اخر الأسبوع. الفرح بقعد أسبوع وانا كثير مبسوط انو راح نلعب سوا كثير.
بالفرح ابوه وأبوي بقعدوا بالشج مع جدي اللي بستقبلو فيو ضيوف الرجال وكرم الضيافة هو من عاداتنا.
امي والحريم يقعدن في البيت او في خيمة كبيرة ، امي وعماتي بتلبسن ثوب مطرز تطريز فلسطيني بالوان حلوة وشال عالكتاف. انا ومحمد بالفرح بنريد نرقص عالدحية والدبكة.
عشان تعرفوني اكثر بدي نلعب لعبة زي اللي بتلاعبني إياها امي بتحزرني حزورة اذا حزرت بتحكيلي قصة وإذا ما حزرت أنا بحكيلها قصة. كل مره كنت احكي قصة من مغامراتنا انا وصاحبي محمد بالحوش.
اسا رح أحزركم أشيا وراح أحكيلكم قصص عني.
1. أول حزيرة بتحبوا تعرفوا ايش الاكلة اللي بريدها انا اكثر من باقي الاكلات ؟ جربوا احزروا؟
ما عرفتوا؟ طيب رح اقول لكم: أنا بحب فتة المبصلة يمكن هاذي الأكلة ببلدكم ما بتسوونها
وهي ( بصل مقسم صغير وبندورة مخرطة مطبوخات وبنفت بيها خبز الصاج وبناكلها ) عندنا في النقب كثير معروفة والأغلب بريدها كثير كثير. أمممممم (زاكيه؟؟) كثير.
2. وكمان صاحبي محمد بريد أكلة ثانية وهو بحبها كثير بطبخوها بالشمال بالنقب مش الكل بطبخها؟ يلا احزروا صاحبي محمد بحب أكلة الشوشبرك. (شيش برك أو شُشْبَرَك هو طبق مشهور في بلاد الشام يتكون الطبق من عجينة تملأ بداخلها لحم غنم مفروم وتُلف على شكل أذن ويطبخ في اللبن)
بتعرفوا الشوشبرك انتوا صح ؟
3. الحزيرة الثالثة كل يوم أنا بنزل من بيتنا لبيت جدتي غصون قبل ما أروح على الروضة ايش بشرب عنها يلا احزروا؟ ما حزرتوا؟ بشرب عندها شاي بحليب اللي بريده.
4. عارفين شو حابب أصير لما أكبر؟ احزروا حابب أصير مزارع واشتغل بارض عندنا, عندي كماشة وطورية وحيوانات بس ضل انو اكبر.
احنا مربين بالحوش حيوانات الي ولولاد عمي واحنا مسؤولين عنهن بنظف حواليهن بسقيهم وبطعمهم كل يوم.
عندي طيور حلوة كثير, عندي جاج، حمام, غنم ,حصان ومهر.
المهر بالذات حابب أخرفكوا عنه لاني بحبو وهو صديقي سميتو رعد انا اللي اخترتلو اسمو.
رعد سريع كثير، مع أنه بعده صغير، بعدو مش مسموح يركبوا عليه الكبار لأنه ما بقدر يشيلهن، رعد بحب يأكل قش وعشب من كفة إيدي. رعد بحب الجزر كمان مرة حاولت أوكله حلويات بس ما قبل ياكلهن لأنه الحصان ما بوكل حلويات.
بالمنطقة عنا ما في عنا جنينة العاب, عشان هيك الأيام اللي ما بنغدر ننزل فيهن عالسبع ع الألعاب. مشوارنا انا وأمي أو أبوي وخواتي رتيل وليان بنمشي على البر بساعات الغروب الحلوة اللي بنتمشى بهدوء (البر: منطقة مفتوحة بعيدة عن البيوت والشوارع) وهناك في كثير أطفال وعائلات بطلعوا ع البر يتمشو بس كلو بروح عالبيت قبل الغروب عشان بصير كثير عتمة.
أنا بحب عيد الأضحى كثير عارفين لي؟ لانو كيف صرتو تعرفوني انا بحب الحيوانات كثير وبعيد الأضحى من الصبح في عنا فعالية الخروف, عمي من الصبح بطلع معنا بجيب الخاروف وبحطو في حوش الدار وانا وولاد عمي بنلاعبو وبنلاطفو بنسقيه مايه وجدتي غصون بتحكيلنا قصة عيد الأضحى.
وعالمغرب بنروح بنعيد ع اهل أُمي، والاخوال والخالات الي ساكنين بعيد ، ناخذلهم الهدايا وهم يطعمونا الحلوايات ويعطوني العيدية الي اشتري فيها العاب . بعد العيد بكم يوم يرجعن الحجاج من الحج ، مره عمتي جابت لي لي ولاخواتي ثوب جلابيه بيضاء وطاقيه مثل الحجاج ، كنت البسها المسا واصلي جنب بوي وعموميتي انا كثير احب البسها.