مرحبا، أنا إسمي أمير.
أميي (هيك في بلدة يركا بنادوا على الأم) اختارت لي إسمي وبوي اختار اسماء اخواتي الثلاث اللي أكبر مني، وأنا أصغر واحد في البيت. أميي سمتني أمير وكمان بتعاملني زي الأمير.
انا بروح على الروضة كل يوم ما عدا جمعة وسبت. بالروضة عندي صحاب كثير بس اكثر اشي انا صحاب مع تيّم وعنان، وكثير منحب نلعب في التراب والرمل ونعبي سيارات ونكفتها. احنا منحب نلعب في الساحة (الروضة) بكل إشي جاي من الطبيعة.
انا كثير بحب الحركة والرياضة وكلهن بضلوا يقولولي اهدى، بس ستي بتقول اتركوه “الحركة بركة”. عشان هيك رحت على دورة جودو وحبيتها كثير. الكل بفكر إنها لعبة دفشة بس هيي بتعلمنا كيف ندافع عن حالنا ونحمي أنفسنا. مش دائمًا بعمل كل الحركات صح، بس المدرب بقولي انه عم بتقدم حلو. في آخر السنة راح يكون في منافسة وراح ييجوا أهلي يشوفوني- كثير متحمس!!
حابب أحكيلكو شو صار معي قبل كم يوم لما رحت على “ماي بيبي”، لعبت بألعاب كثيرة ودخلت غرفة الفضاء وانبسطت كثير. وبنفس الليلة ما كنت عارف أنام، اتطلعت من شباك اوضتي على السما وصرت أراقب النجوم والغيوم وتخيلت كثير أشكال حلوة من الغيوم…وفكرت كيف بقدر أوصل للقمر والنجوم؟ عندكو فكرة كيف؟

بفكر حلمي بتحقق إذا صرت رائد فضاء بالمستقبل، ساعتها بقدر أطلع على القمر لإنه أنا بعرف انه رواد الفضاء بصلوا لهناك.
ستي (الجدة) ساكنه تحتينا، وبيوت عموميتي كمان في نفس البناية، حوالين البيت في حاكورة (أرض لزرع الشجر قرب المنازل) اللي بلعب فيها مع ابن عمي جواد ومع أيلن بنت عمي، بنعبي تراب في الديزلات وبننقلهن من محل لمحل.
في كثير أشياء بحب اعملها مع ستي، مثل لما تسقي الزريعة… لمى أسألها ليش بتعتني فيهن، بتقلي عقد (على قد) ما بتعطي- الطبيعة بتعطيك يا ابني…شوف محلا شكلهن وريحتهن ولونهن…وما احلى قصص ستي اللي دايمًا بتحكيلي اياها.
محلاها ستي بحب أعبطها كثير لإنها دافية وحنونة كثير، وبحب أقعد في حضنها وهي تحكيلي القصص- وكل قصة أحلى من الثانية. هي حكتلي عن ملابسها وملابس سيدي التقليدية، لانهن ما بلبسوا مثل بوي وأميي، ستي بتلبس ثوب أسود أو كحلي طويل وبتغطي راسها بالفوطة البيضا (الشال) وسيدي بلبس قمباز (شروال\اللباس) طويل مع قميص مكوي.
سيدي صالح دايمًا بوخذني معه على الأرضيات، بنسقي وبنرطب الزتونات ولما نلمهن بياخذني معه على المعصرة. انا بحب سيدي وستي كثير، راح كمل بطريقهن وأحافظ على الأرض والزاتون. سيدي بقول “الأرض مثل العرض يا سيدي دير بالك عليها”. سيدي وستي ملاح كثير فضروري احنا كمان نعاملهم مليح.

كيف بتتعاملوا انتوا مع سيدكم وستكم؟
انا بحب آكل من اكلات أميي الطيبات وبالأخص الاكلات اللي فيها رز زي ورق العنب…وبحب المعكرونة كثير، أميي بتقولي انها أكلة طليانية وهي بتحب الاكل الطلياني مثل البيتسا كمان…وبحب التبولة مع الكبيبة بس ما تكون حراقة…وما اطيب الشنيتسيل السخن والمقرمش من إيديها، بس أكثر اشي بحبه هو اني أدهن خبزة مع معجون البندورة وخاصة لما آخذها زوادة على الروضة…تيّم وعنان بحبوها كمان وبطلبوا مني نتقاسم الخبزات الي معانا. مرة طلبت من أميي تحطلي ثلاث خبزات إلي ولاصحابي، صاروا كل أولاد الصف بدهن منهن.
كثير بحب أرسم وأدهن بكل الألوان، بحب ألوان نجمة الخمس حدود الدرزية بألوانها الأصفر، الأزرق، الأبيض، الأحمر، والأخضر. لما ألونها بكون مبسوط، بفرجيها لمعلمتي وبطلب منها آخذها على البيت. بوي وسيدي بكونوا فخورين فيي. واكثر اشي بحبه أني أحمل العلم الدرزي لما بروح على “زيارة مقام سيدنا النبي شعيب”. بعيد النبي شعيب بيكون مليان ناس بالمقام، كل ما أمرق جنب المشايخ بعايد عليهم وبحكيلهن “زيارة مقبولة”. بنبسطوا وبسألوني اذا أنا حفيد سيدي صالح، بقولهم إي وببتسم وبكون فخور بحالي وبسيدي حبيبي.