أنا نور بعدني بتعلم بالروضة عايشة في بلد حلوة عنا بالبيت جنينة فيها أشجار وورود عندي 3 اخوة أخوي اسمو مقداد وأختين فادية وياسمين.
في الروضة كثير بحب العب بركن المنزل وأكثر ركن بحبه ركن العلوم لأنه فيه هناك تجارب وفي عدسة مكبرة بقدر أشوف فيها الأشياء الصغيرة بشكل أوضح، مثلا نملة صغيرة بالعدسة مكبرة بصير حدمها أكبر وبشوف رأسها أكبر وكل تفاصيل جسمها الصغير بتصير أكبر، وعادة بحب العب مع صاحبتي شمس بالروضة ومرات بقلها تيجي لعندي عالبيت.
عادة بحب العب مع صاحبتي شمس بالروضة ومرات بقلها تيجي لعندي عالبيت. رح أحكيلكو بعدين قديش بحب الاكل كل شي طيب بحب اعرف كيف بصير طيب هيك؟ يعني حبة بندورة هي حبة بندورة بس لما ماما تقشرها وتقسمها وتغليها مع مي وملح بتصير دبس البندورة طعمتو بتشهييي ولونو واااو احمر أحمر.
معلمتي بالروضة كثير بتحكيلنا قصص حلوة ومنهن قصة عن عيد الأضحى وخروف العيد وقصة الحج والحجاج ومنغني معها “أغلى وأجمل هدية منقدمها عيدية للصلى واللي صام وقدم ضحية”.
في مرة سألت معلمتي بالروضة مين بتقدر سته تيجي تحكيلنا قصة؟ حكيتلها انا بقدر وستي وافقت على طول لما سألتها.
ويومها كانت مفاجأة حلوة لأصاحبي في الروضة ستي أجت على الروضة لابسة فستان لونه أسود وعليه تطريز فلسطيني باللون الأحمر، وكثير أصحاب بالروضة حبوا قصة ستي وانا كثير كنت مبسوطة فيها لأنها أجت على الروضة حضنتها، بستها (قبلتها) ومسكت ايدها واحنا مروحين عالبيت وانا أغني من فرحتي “ستي عندها ثوب وشال” وستي كانت مبسوطة لأني فرحانة ، أصلا أنا كثير مرات بروح (برجع على البيت) من الروضة على بيت ستي لأنه الماما بكون عليها شغل كثير وبتتأخر وما مسموح اروح من الروضة لحالي أو أضل بالبيت لحالي. بتيجي ستي على الروضة بتوخدني وبضل عندها بتغذى عندها أحلى الأكلات لحتى تيجي أمي من الشغل وتروحني على البيت.
وكثير بحب تدهنلي خبزة مع زيت وزعتر أو لنبة أو جبنة بيضا عند ستي الأكل طعمه طيب، برتاح شوي عند ستي والا الماما جاي من الشغل بروح معها على البيت.
اكثر يوم بحبو بالأسبوع هو يوم الجمعة كأنه يوم عيد لانه ما في شغل الماما والبابا بضلوا في البيت، البابا عادة كل يوم جمعة بصلي صلاة الجمعة في الجامع مش بالبيت بالمسجد اللي حد بيتنا هو وأعمامي كمان، بضل استنى تتخلص صلاة الجمعة عند الشباك بس أشوف البابا جاي ع البيت مع أعمامي بنزل بسرعة بركض لعند البابا بعبطه عبطة قوية وبحكيله “قبل الله” (تقبل الله).
على الغدا بنتجمع كلنا مع بعض على اكله يوم الجمعة بعد ما يروحو الزلام من صلاة الجمعة بنتجمع احنا وعمامي واولادهن على اكلة الملوخية والجاج المحشي يمييي شو طيبة. في بيت ستي وسيدي بعزمونا كلنا هيك متعودين دايما بسالهن كيف بطبخوا بحكولي يا نور ” لما تكبري كمان شوي بتتعلميها” بس انا بساعد ستي بتقطيم الملوخية قبل بيوم. وبعد الغذاء بنساعد بعض بضب الطاولة وبعد ما نخلص منلعب ومنكيف بالجنينة.
يوم الجمعة بذكرني كثير كثير بشهر رمضان لأنه كمان في لمات حلوة وزينة وأضوية منزين فيها البيت من برا ومن جوا فوانيس بالوان وأحجام مختلفة عند مدخل البيت بنعمل ركن في البيت اللي فيو قران وسجادة صلاة وبنلتزم بقراءة القران في شهررمضان. وكمان منفطر ببيت ستي وسيدي، وكلنا مع بعض، بس بشهر رمضان الأجواء كثير حلوة وكل بيت بيعمل أكلة أو سلطة ببيته ومنزلهن على بيت التيتية وسيدوووو ومنتجمع مع بعض أو بتكون طبخة كبيرة لكل البيوت مثلا رز ولبن منسف النا ولأعمامي ومنستنى اذان المغرب، منبدأ الفطور وهاد مش فطور الصبح بتعرفوا ليش بيحكوله فطور؟
وايش أول اشي منعمله قبل ما نبدأ الأكل؟ (الدعاء)
أولا “اللهم لك صمت وعلى رزقك أفطر” بسم الله الرحمان الرحيم منشرب كأس ماء وحبة تمر وبعدها كأسة الشوربا السلطة والأكلة الأساسية (الرئيسية)، بعد الفطور منتساعد بضب الطاولة والجلي وترتيب البيت وتبلش السهرات الحلوة يوم قطايف بجبنة أو قطايف مع جوز ويوم عوامة حلويات شهر رمضان كثير لذيذة أنتو شو بتحبوا؟
ايش اسم العوامة ببلدكم ؟ عوامة؟ زلابية؟ لقمة القاضي؟ لقيمات؟
والحلو أنه البابا بشهر رمضان كثير بساعد الماما بتجهيز السفرة والأكل على الطاولة أنا برتب الصحون وخصوصا وقت السحور وفي أيام البابا هو اللي بجهز السحور وبصحينا واحنا نايمين قبل اذان الفجر وبيحكيلنا ” تسحروا فان في السحور بركة”.
في ليالي انا قبل الكل بصحى وبصحي الجميع” يا نابم وحد الدايم طمتم طم طم تطمتم طم” بمسك معلقة وطنجرة وبعمل حالي مسحراتي. ” قوما على سحوركم اجا رمضان يزوركم”، أنا بتسحر بس ما بقدر اصوم لساعات طويلة بحاول بس اصحى الصبح أروخ على الروضة صايمة ولما أشعر بالجوع باكل زوادتي.

شهر رمضان بمرق بسرعة بس اللي بخلينا انبسط انو بعدو عيد الفطر,اكثر عيد بحبو هو عيد الفطر، أجواء عيد الفطر كثير حلوة, بنفيق بكير وبنلبس اواعي العيد وبروح ازور عماتي مع الزلام. وماما بتضل بالبيت تحضر طاولة العيد عشان راح يجو دار سيدي وخوالي مرات بتطلب مني اضل اساعدها وبضل.
عالعيد باخذ عيدية كثير وبحب أجمعها بالقجة (الحصالة) الماما حكتلي انه بقدر اعطي المصاري اللي بالقجة لحدا حتى يشتري اواعي او أي اشي بيحتاجه.
بحب أسافر وكل مرة بسأفر مع عيلتي بشتري دمية وصار عندي من كل بلد سافرت عليها لعبة، حطيتهن في غرفتي وكل يوم بختار لعبة أنيمها حدي وبغنيلها ” لعبتي الصغيرة نامي بأمان”.
بس أكبر رح اسافر على بلاد كثير وأضل أجيب من كل بلد لعبة.